ل دویڤ بڕیارا وەزارەتا خواندنا بلند و ڤەکۆلینێن زانستی، دو بابەتێن نوی بۆ پڕۆگرامێ خواندنێ ل سەرانسەری زانکۆیێن هەرێما کوردستانێ دێ هێنە زێدەکرن. زانکۆیا زاخۆ ژی، د چارچۆڤێ ڤێ بڕیارێ دا، بابەتێن گرێدایی "پەرەپێدانا کار و کارسازیێ" خستینە د ناڤ پڕۆگرامێ خۆ یێ ئەکادیمی دا.
ب مەرەما ئامادەسازیێ و جێبەجێکرنا ڤێ بڕیارێ ب شێوەیەکێ ئەکادیمی، ب ئامادەبوونا ڕێزدار (پ.هـ.د. رمضان جعفر مصطفی) هاریکارێ سەرۆکێ زانکۆیێ بۆ کاروبارێن قوتابیان، خۆلەکا ڕاهێنانێ بۆ دەمێ هەشت ڕۆژان بۆ (٢٠) مامۆستایێن زانکۆیا زاخۆ هاتە ڤەکرن. د قۆناغا دەستپێکی دا، خواندنا ڤان هەردۆک بابەتان دێ ب تنێ ل کۆلیژێن زانست و ئەندازیاری هێتە پەیرەوکرن؛ بۆ ڤێ چەندێ ژی، ل هەر پشکەکا زانستی دو مامۆستا بۆ گۆتنا بابەتی هاتینە دەستنیشانکرن. پشتی هەڵسەنگاندن و سەرکەفتنا ڤێ قۆناغێ، دێ ئەڤ پرۆسەیە ل سەرانسەری پشک و کۆلیژێن دی یێن زانکۆیێ هێتە گشتگیرکرن.
تایبەتمەندییا ڤان بابەتان ئەوە کو میتۆدێ خواندنێ دێ ب تەمامی ب شێوەیێ پراکتیکی (کارپێکری) بیت و ژ شێوازێ تەقلیدی یێ تیۆری یێ جودا بیت. د ئەنجام دا، هەر قوتابییەک دێ ل دوماهییا کۆرسێ پڕۆژەیێ خۆ یێ پراکتیکی پێشکێش کەت و دێ ژ لایێ مامۆستایێ بابەتی ڤە هەڵسەنگاندنا زانستی بۆ هێتە کرن.
هەژی گۆتنێ یە، بڕێڤەچوون و پەیرەوکرنا ڤان هەردۆک بابەتان ل سەرانسەری زانکۆیێ، دێ ل ژێر چاڤدێری و سەرپەرشتییا ڕاستەوخۆ یا سەنتەرێ پەرەپێدانا کاری (CDC) بیت.
خۆل ژلایێ هەردۆک مامۆستایێن خودان شیان:
١- لاوند اکرام محمد
٢- فرهاد سالم جمیل
دهێتە پێشکێشکرن.